Gairmréim leis na hinstitiúidí Eorpacha, gairmréim duitse?

.

Seo deis duit difear a dhéanamh

An bhfuil gairmréim spreagúil nua uait i dtimpeallacht dhinimiciúil ina mbíonn go leor ag tarlú? Má tá, is fiú duit smaoineamh ar phost leis na hinstitiúidí Eorpacha. An té atá ag obair do cheann d'institiúidí an Aontais Eorpaigh nó i gceann de ghníomhaireachtaí an Aontais, tá láthair oibre shuimiúil dhúshlánach roimhe. Cúlra de gach saghas a bhíonn ag iarratasóirí ar phoist sna hinstitiúidí Eorpacha, mar sin beidh tú ag obair le grúpa comhghleacaithe éagsúil ilchultúrtha mar chuid de ghairmréim leis an Aontas Eorpach. Beidh an deis agat lántairbhe a bhaint as do scileanna teanga freisin. Bíonn ort bheith in ann dhá theanga oifigiúla de chuid an Aontais, ar a laghad, a úsáid i bhformhór na bpost leis an Aontas Eorpach. Má théann tú i gceann gairmréime leis an Aontas Eorpach beidh tú in ann freastal ar ranganna teanga chun feabhas a chur ar do chuid scileanna teanga. Cuirfear tacaíocht ar fáil freisin do na baill foirne nua ar fad lena chinntiú go mbainfidh siad barr a gcumais amach sa ghairmréim atá roghnaithe acu. Bíonn tuarastal iomaíoch ag gach iarratasóir a fhaigheann post.

Chomh maith leis an bhflúirse deiseanna ar obair le hinstitiúidí agus gníomhaireachtaí an Aontais Eorpaigh sa Bhruiséil agus i Lucsamburg, agus i Strasbourg freisin, cathracha beoga agus lán cultúir, tá líon mór post ar fáil i ngníomhaireachtaí atá lonnaithe i ngach cearn den Eoraip agus i d toscaireachtaí de chuid an Aontais ar fud an domhain.

 

Obair dhúshlánach shuimiúil

Na daoine a oibríonn in institiúidí an Aontais Eorpaigh, bíonn siad ag plé leis na mórcheisteanna a bhíonn go mór i mbéal an phobail. A leithéidí seo: an t-athrú aeráide, imirce, sábháilteacht agus sláinte, trádáil, cumarsáid mhóibíleach.


Soghluaisteacht post

Ní post saoil atáimid a thairiscint ach poist éagsúla feadh do shaoil oibre. De bharr na scéime soghluaisteachta post atá againn dár bhfostaithe, féadfaidh tú aistriú ó sheirbhís go seirbhís agus ó institiúid go hinstitiúid.

An Bhruiséil agus Lucsamburg

Is iondúil gur sa Bhruiséil nó i Lucsamburg a théann daoine i mbun gairmréime sna hinstitiúidí Eorpacha. Cathracha fáilteacha, glasa, idirnáisiúnta, iltíreacha, atá suite i gcroílár na hEorpa, is ea an dá chathair sin.

Páirt a bheith agat i dtodhchaí na hEorpa a thógáil

Ní chun brabús a dhéanamh do chomhlacht a bheidh tú ag obair ach chun feabhas a chur ar shaol 500 milliún saoránach Eorpach. Dúshlán is ea é sin, agus pribhléid.

Timpeallacht oibre idirnáisiúnta

Bíonn fostaithe an Aontais ag plé gach lá le comhghleacaithe as gach ceann de na 28 mBallstát. Timpeallacht oibre shuimiúil spreagthach í timpeallacht oibre ilnáisiúnta ilteangach na n-institiúidí Eorpacha. Ina theannta sin, tá an fhéidearthacht ann dul ag obair i ngníomhaireachtaí de chuid an Aontais ar fud na hEorpa agus ar fud an domhain.


Éagsúlacht agus comhionannas

Beidh tú ag obair le comhghleacaithe tréitheacha a bhfuil cúlraí de gach saghas acu. Ina cháil mar fhostóir, ní dhéanann an tAontas Eorpach aon idirdhealú atá bunaithe ar aon fhoras amhail gnéas, cine, dath, bunús eitneach nó sóisialta, airíonna géiniteacha, teanga, reiligiún nó creideamh, tuairim pholaitiúil nó aon tuairim eile, ballraíocht i mionlach náisiúnta, maoin, breith, míchumas, aois nó claonadh gnéasach. Beidh deis agat do chuid inniúlachtaí a léiriú le linn an phróisis roghnúcháin.